قصيدة : صبح الصبح - مجتمعية - عاميه بقلم/ حسن الدسوقي - لعام 2018

قصيدة : صبح الصبح - مجتمعية - عاميه
بقلم/ حسن الدسوقي - لعام 2018
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
صبح الصبح ..
وزقزق العصفور
ع الشجره فوق الدور
اللي مزروعه ف غيطنا البور
صبح الصبح ..
وافكاري اللي ليلاتي
ونهاري بتلف ودور
ف عقلي وعدلي
اللي مش معدول
وحيرتي وتنهيدتي
وقلقي وقلبت العقول
شئ غريب مش معقول
ودمي اللي طول الليل
محروق زي عود بخور
وفكري اللي طاح ف يمي
وايد امي وهيا بتسمي
وتصحيني فتلاقيني
سهران قاعد وحيران
لحد اما صبح الصبح ..
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
صبح الصبح ..
وابتدت الخلق تصحي م النوم
اللي مبسوط واللي فرحان
واللي حزين واللي شايل هموم
والعيال بتغير الهدوم
ويجروا ع المدارس
ونحكي شويه ع الكوارس
ومشاكل الصبحيه
ولو لسه فاكرين
خلفات سطحيه
شرحت فيها واستوفيت
لحد ما استكفيت
ع الخلافات الاسريه
وقلت ليه الصبح كل
الشعب بيبقي مخنوق
ومشطايق هدومه يمكن
عشان القلب مغلوق
عن ذكر رب البريه
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
يا عالم معالم حزنه من فرحه
لامته نسأل بعض الحب مين جرحه
ولامته نكتم حقايق مخبيها
العريس ف ليلة فرحه
لو كل شيء ف حياتنا مرار
وحقد وغل وكره وفتنه ونار
مين بس اللي ف سكتنا طرحه
وايه مسكتنا علي فرقتنا
مين اللي قرا نص
درسي ونسي شرحه
مين اللي سهرني طول الليل
على ونسه ونام هو
بكل عزم وقوه
لحد اما صبح الصبح .