الشاعر. صلاح منير يكتب/أمومة
أمومة - بقلمي: صلاح منير
أيوا يا أمي أنا بقيت أم
بعد ما كنت طفلة ضمن عيالك
شايلة ضناية لصدري بضم
دارية تمام باللي جرى لك
من دلوقت بدأت أشيل الهم
أيوا يا أمي أنا دلوقت بكرر دورك
أيوا عرفت بوعي معنى الأم
أيوا زاد تقديري يا أمي لجميلك
عرفت قد ايه يا أمي شلتي الهم
ودلوقت يا أمي شايلة ولاد غيرك
لسة بتلعبي يا أمي بردو دور الأم
عايزة تربي وتشيلي هم حفيدك
غيرك يا أمي ما في الدنيا عندي أهم
فاكرة يا أمي لما كنت معاك في بيتك
كنتي يا أمي شايلة تملي عني الهم
ومشيا أنا يأمي ببركة دعواتك
فاكرة شقاكي معايا فاكرة الدعم
كنت ساعات كتير يمكن بأعصاك
كنت فاكرة أوامرك لي دي ظلم
وانك عايزاني أمشي على هواك
كنت بقولها في سري دا تحكم أم
رغم دعاك لينا في صلاك
كنت أنا غلطانة أكيد في الحكم
أنا دلوقت طمعانة أكثر في رضاك
أصلي كبرت يا أمي وبقيت أم
وقدرت كتير قيمة تعبك وأنا وياك
أيوا يا أمي أنا بقيت أم
بعد ما كنت طفلة ضمن عيالك
شايلة ضناية لصدري بضم
دارية تمام باللي جرى لك
من دلوقت بدأت أشيل الهم
أيوا يا أمي أنا دلوقت بكرر دورك
أيوا عرفت بوعي معنى الأم
دا اللي من غير أم حقيقي حالة يغم
باركيني يا أمي على طول بدعاك
ربي ما تحرم أبدا حد رضا الأم
صلاح منير
1/03/2018
تعليقات
إرسال تعليق