الشاعر. أيمن خليل يكتب/كتفاً قلم
.. كتفاً قلم ..
شِد ف مدادك واقذفه..
واظبط عزيمتك عالنشان
ركز كمان ..
دوّن على ورق الزمن
كل اللي كان..
إكتب بإحساس الخلايق كُلها
دوّن مشاعرهم رموز
فيها ملامح شكلها
إرسم خطوط مجرى السنين
بيّن أخاديد الشجن
صوّر تعَاريج الجبين
واوصف عرقها .. وكَلّها
لوّن دموع المظلومين زي البحور
موج الألم على شط مردوم بالصخور
بيفتت الدمعة الحزينة المؤلمة
بين السطور
سجل بقلمك كل صرخة اتزلزلت بيها الصدور
أبدر بذور على صفحة الفجر الجديد
ومعاها ميت مليون وليد
إرسم كمان دم الشهيد
وادعي الإله .. يكون مدادك من حديد
ونعلي بيه حد المحن
ونبني بيه بكرة الأكيد
كتفا قلم ..
وفهمنا إن الحلم بين ورقة وقلم ..
ساري و علم
وسلام سلاح عالي الهمم
وميدان يساع كل الحناجر والهتاف ..
وودان حجر صابها الصمم ..
بركان بيحدف في الحمم
نار القلوب تلفح وشوش كل الطغاة..
تشعل أفق غدر ف مداه
بيدفعوا كل التمن من ألف عام أرواح و دم
تعليقات
إرسال تعليق