كلمتنا /مهندس شاعر (على البحيرى ) (الحلقة الرابعة لملحمة ام ابراهيم) {بعنوان -----صرخه}
كلمتنا /مهندس شاعر
(على البحيرى )
(الحلقة الرابعة لملحمة ام ابراهيم)
{بعنوان -----صرخه}
☑قـم للمعلم ووفـه التبجـيلَ ☑
💥💢💢💢💢💢💢💢💥
☑كاد المعلم أن يكون رسولَ ☑
وحزينه خالتى ام ابراهيم
والحزن كاسر ضهرها
والغم كان باين عليها
قربت منها سألتها
مالك ياخاله حزينه ليه
وشايله ليه كده همها
قالت محزني الهوان
وحال بلادنا كلها
حال المدرس اللى هان
من بعد عز فى مجدها
قولتلها خليها على الكريم
سبحانه صاحب حلها
قالت ياحسره على الشباب
راحت هممهم كلها
واخدنها هلس وموضه ليه
عيشنها حاجه وعكسها
؟؟؟؟؟؟؟؟؟؟؟؟؟؟؟؟؟؟؟؟؟؟
عشت النهارده يوم حزين
على أحلى حاجة بحبها
المدرسة وأيام زمان
وطابور صباح زان حسنها
هيبة المدرس والمدير
بالعزة حاكم صرحها
وبحرص بيراقب الفصول
مشغول بحالها وعلمها
تربية تسبق كل شيئ
والعلم يتبع شرعها
¤¤¤¤¤¤¤¤¤¤¤¤
شفت المبانى شيدوها
مرسومه يجمال شكلها
دهنوا الحيطان والحوش كمان
غسلوا السلالم كلها
سبوره عاليه فى كل فصل
وتخت جديدة تحبها
كل اللي لازم للاساس
موجود بطولها وعرضها
🏡🏡🏡🏡🏡🏡🏡
ودا الأهم بيعملوه
والمنظره وشغل الروتين
اما المعلم والكتاب
فى الوحل اسفل سافلين
راحت كرامته من زمان
والعله هنجبله منين
اصبح يبيع علمه بفلوس
علشان يوفي كل دين
مكسور عليه أو جمّعه
لطعام ومصاريف السنين
📚📚📚📚📚📚📚📚📚
بالزمه دا اسمه كلام
نزرع طمع في مهنته
نفتحله ماركت للدروس
ونقول دا راحت زمته
بعد مكان قائد مكان
والكلمة كانت كلمته
أصبح بسيط وسط الولاد
راحت مهابته ونظرته
لو قال لطالب يابنى عيب
يلعن كرامة عمته
والصبح يجى الباشا ابوه
يرفع قضية بعزوته
او تيجى ست تهزقه
وفى القسم تكبر بلوته
والخيبة فى وزارته ياناس
عاجزه ان تمسح دمعتة
👉👉👉👉👉👉👉👉
محضر وضبط للهمام
وجت المباحث جرته
والضابط اللي كان هناك
ماراعاش مكانة حضرته
من تعبه جاله احباط وداخ
حاول يريح جتته
قعد على الكرسى بعشم
انه يفوق من محنته
لكنه لحظتها عرف مكانته
وكمان جرئته
😰😰😰😰😰😰😰😰
لما صرخ الباشا قال
قم فز رد يامتهم
خدوه على الحجز بتمام
على بال مننظر علته
تعب المدرس زاد كمان
القهر فجر أزمته
وربنا بلطفه هدى
اتنين تلاته فى دفعته
راحوا بسرعه للمدام
بالعافيه سحبت شكوته
من بعدها خرج الهمام
مكسور في وسط بدلته
صعب عليهم مهما كان
لازم نرجع بسمته
عدوا على الدكتور فلان
يكشف ويكتب وصفته
والكشف كان مخصوص عشان
الباشا خلص جلسته
مرعاش فى يوم كان ينتظر
الشرح وافى لحصته
وكأنه ما تعلم فى يوم
درس النباله فى تختته
📝📝📝📝📝📝📝📝
خرجوا الجماعة للطريق
من بعد ما جابوا العلاج
عدى عليهم شب شيك
كان حاله فى التعليم هباب
ماكنش غاوى تعب دماغ
والصنعه عنده فوق الكتاب
طلع وشق طريقه زين
لف الورش عرف الحساب
عدى عليهم ماانكسف
أسرع من الصوت والسحاب
والفيرنا🚙 عجلاتها الجديدة
أهى عفرت فوقهم تراب
مش بس دا اللى بيحصدوه
دا مثل قليل للبظوطه
العلم أصبح للغنى
وأبن الفقير فى المخرطه
ومدرسين رايجين ياعين
والباقى عايش بالعطا
يايجيب له تاكسى يدوره
او اى مهنه ومرمطه
كبرها تكبر يامدير
تصبح أمير البهوطه
أصبح تمامهم فى الحضور
دفتر روتين ستر وغطا
🚘🚘🚘🚘🚘🚘🚘🚘
قلتلها ?حاولو ناس كتير
يعدلوا فيها بأساس
ويطورا العلم ودروسه
علشان يناسب أي ناس
بعثات كتيره بيبعتوا
أحسن بلاد منحه بمقاس
للواصلين والمعروفين
وأولاد فلان والجيب أساس
فيه اللى زاغ مرجعش تانى
وفيه اللى رد بعقله ماس
لما اتصدم بالمنهجه
والمعلمه وحفظ التراس
وفيه اللي كان غاوى العلوم
رجع بعلم وجاه وداس
ماركت كبير يحلب فلوس
ووزارة غرقانه فى نعاس
يحكم وينهى حضرته
والحجز بالوسطه 👌وباس
إيد المدرس والغفير
علشان ضناه يلحق ياناس
لو حتى هيبيع الهدوم
او حتى يمشى بدون مداس
مغصوب وقرشه بيجمعه
بالتيله والحيله ياناس
مغلوب على أمره الجدع
نفسه الولاد تعلى بأساس
احسن ما تبلعهم شوارع
او ينكسر فيهم تراث
⏳⏳⏳⏳⏳⏳⏳⏳
بصت لى خالتى ام ابراهيم
وقالت بقولك ايه ياواد
عارف فلاح اولادنا إيه
من غير مناهده او عناد
علشان يعود شاطر أمين
ويعلى شئنه فى العباد
ونفتخر بيهم نقول
استلموا رايات البلاد
راح تعلى بيكم تفتخر
ونجومكم نورها بان وقاد
☑☑☑☑☑☑☑
ناخد المعلم نكرمه
ونمكنه ونقومه
يرجع ويخلص فى العطاء
شاطر ضعيف هيفهمه
يصبر على الطالب عشان
واجب وحق يعلمه
نرفع مراتبه فى السما
فوق كل حاجه نعممه
نعمل حصانه لشخصهم
ومن اى غدر نسلمه
ميكونش مشغول بالحياة
ولا غير رسالته نلزمه
وإن سنه وداه للمعاش
مليون تحيه نعظمه
يكتب رسالته فى الحياة
واحنا واجبنا نكرمه
نجزيه مرتب أعلى شيء
وعقد بينا يلزمه
(ازاى تساوى اى ناس )
((بمرتب إللى علمه ))
(إزاى نساوى اى ناس )
((بمرتب إللى علمه ))
بس المهم العقد دا
لازم سعادته يحزمه
ولا فيه دروس ولا فيه صالات
ووراه رقابة تقيمه
وان جه فى يوم قصر وخان
فى ميدان نحطه ونرجمه
والحذف من كل الصفات
ولا حد يومها يرحمه
♎♎♎♎♎♎♎♎
كدا التقدم نضمنوه
نرجع لمجد كان نَسينا
بينادي فينا من زمان
حتى التراث شاهد علينا
نفرد قلوعنا للحياة
ميهمناش ربك حمينا
مدام رجعنا للطريق
ووصية المبعوث نبينا
أقرا وعلم كل جيل
والجهل يتزاح من علينا
نرقى بفلاح ونعيش نجاح
والعز هتشوفه عنينا
ولا يوم نخاف غدر وظلام
بالعلم هتسير السفينه
والشارع اللي كان ظلام
بالعقل هتقيده إدينا
كلماتى /مهندس شاعر
(على البحيرى )
تعليقات
إرسال تعليق